المنديل الأسود

يا ام المنديل الأسودْ..
جنّني الشعر لـ جوّاتو..
جوّاتو أملسْ أو أجعدْ..
جوّاتو أشقرْ أو أسودْ..
أنا بـِفْدي بعُمري خصلاتو

***

عمليلي من شعرك مسندْ
تــ إنسى العمر ومأساتو
من خيوطو إبـْني معبدْ
وقضّي عمري عم بعْبَدْ
الله اللي تسلم ديّاتو

***

عمليلي من شعرك موقدْ
حميني من البرد وعلاتو
الشتوية الجاية أبرد...
خبيني بكنزك هالأسودْ
أنا قلبي خلصو كنزاتو

***

أنا بدّي من شعرك موعد
تـ يحكي قلبي حكاياتو
وأوصفلك حالي وإسعدْ
وقدّملك وعدي وعن جدْ
ما إحلفْ إلا وحياتو..

***
***

ماجد حجازي
2005